नवी दिल्ली : २८ जानेवारी – महाराष्ट्राच्या एनसीसी कॅडेट्सनी अभिमानास्पद कामिगिरी करत पीएम बॅनर जिंकला आहे. दिल्लीत प्रजासत्ताक दिन साजरा झाल्यानंतर पंतप्रधान मोदींनी आज एनसीसीच्या कॅडेट्सचे संचलनाचे निरीक्षण केले. यापूर्वी एनसीसी कॅडेट्सनी संचलन करत पंतप्रधान मोदींना गार्ड ऑफ ऑनर दिला. यानंतर सर्वोत्तम कामगिरी करणाऱ्या एनसीसीच्या कॅडेट्सचा पदक देऊन पंतप्रधान मोदींनी गौरव केला.
पंतप्रधान मोदींनी एनसीसी कॅडेट्सना संबोधित केले. मी एनसीसीमध्ये होतो, याचा मला अभिमान आहे. एनसीसीला अधिक बळकट करण्यासाठी आपले सरकार आवश्यकती सर्व पावले उचलत आहे. एनसीसीमध्ये मोठ्या संख्येने मुलींचा सहभाग वाढत आहे. बदल संपूर्ण देश बघतोय, असं पंतप्रधान मोदी म्हणाले.
गेल्या दोन वर्षात सीमाभागातील जवळपास २ लाख विद्यार्थ्यांचा एनसीसीमध्ये समावेश झाला आहे. देशाच्या तळागाळापर्यंत जाण्याचा प्रयत्न आहे. युवाशक्तीच्या या सहभागाने आणि पाठिंब्यात देशाचे भवितव्य बदलण्याची क्षमता आहे. अंमली पदार्थांच्या सेवनाने तरुणांचे आयुष्य उद्ध्वस्त होत आहे. आपण सर्वांनी याविरोधात लढलं पाहिजे, असं आवाहन पंतप्रधान मोदींनी केलं.
देशातील इतर राज्यांच्या पथकांना हरवत महाराष्ट्र एनसीसी कॅडेटच्या पथकाने सर्वोत्तम संचलन केले. प्रजासत्ताक दिन संचलन शिबिराच्या निमित्ताने महाराष्ट्र एनसीसीच्या कॅडेटच्या पथकाने प्रतिष्ठेचा पंतप्रधान बॅनर पटकावला आहे. महाराष्ट्र एनसीसीला ८ वर्षांनंतर हे यश मिळाले. २००२ ते २०१३ दरम्यान सलग सहा वेळा महाराष्ट्र एनसीसी संचालनालय विजेते होते. त्यानंतर २०१९ पर्यंत महाराष्ट्र मागे पडला होता. २०२०, २०२१ मध्ये उपविजते. आणि आता पुन्हा महाराष्ट्र एनसीसी विजते ठरले आहे.
