अमरावती : २३ जून – अमरावती येथून विमानसेवा सुरु होण्याच्या दृष्टीने विमानतळाची कामे पूर्ण करण्याच्या हालचालींना वेग आला आहे. विमानतळाच्या अद्ययावतीकरणाच्या शासनाच्या निर्णयानुसार अत्याधुनिक विमानतळ अमरावतीत साकारण्यासाठी अपेक्षित कामे होणे आवश्यक आहेत . याबाबत सुधारित प्रशासकीय मान्यतेनुसार निधी उपलब्धता व इतर बाबींसंदर्भात लवकरच मुंबई येथे बैठक घेण्यात येईल व आवश्यक निधी मिळवून देऊ, अशी ग्वाही पालकमंत्री यशोमती ठाकूर यांनी दिली.
पालकमंत्र्यांनी अमरावतीच्या बेलोरा विमानतळाला भेट देऊन अधिका-यांशी चर्चा केली व संपूर्ण विमानतळाची पाहणी केली. अमरावती हे विभागीय मुख्यालय आहे. येथील विमानतळावर एटीआर-७२ किंवा तत्सम प्रकारची विमाने उतरण्याची सोय होण्यासाठी धावपट्टीचा विस्तार करण्यात येत आहे व येथे रात्रीच्या वेळी विमाने उतरण्याची सुविधाही निर्माण होणार आहे. या विमानतळाचा उडान (आरसीएस) या केंद्र शासनाच्या महत्वाच्या योजनेत समावेश करण्यात आला आहे. त्याअंतर्गत उडान ३. ० मध्ये अमरावती- मुंबई विमानसेवा सुरु करण्याचा मार्ग अलायन्स एअरलाईन्स यांना उपलब्ध करुन देण्यात आला आहे. त्यामुळे एमएडीसी प्रशासनाने वेळोवेळी पाठपुरावा करून कामांना गती द्यावी, असे निर्देश पालकमंत्र्यांनी यावेळी दिले.
विमानतळाला पाणीपुरवठा उपलब्ध करण्याचे काम पूर्ण करण्यात आले आहे. अतिउच्च दाबाच्या वीजवाहिन्यांच्या स्थलांतराचे काम पूर्ण झाले आहे. बडनेरा- यवतमाळ वळणरस्त्याचे बांधकामही पूर्ण झाले आहे. विमानतळाच्या संरक्षक भिंतीची उभारणी करण्याचे काम प्रगतीपथावर आहे. विमानतळावर नवीन टर्मिनल इमारत उभारण्यात येत असून, त्याची निविदा प्रक्रिया प्रगतीपथावर आहे. धावपट्टीची लांबी १३७२ मीटरवरून १८५० मीटरपर्यंत वाढविण्यात येणार आहे. हे काम प्रगतीपथावर आहे.
एटीआर-७२ विमाने उतरण्याची सुविधा व नाईट लॅडिंगच्या सुविधेसाठी विस्तारीकरणाची कामे करण्यासाठी ‘एमएडीसी’कडून ‘राईटस् लि.’ या कंपनीची निवड करण्यात आली आहे. ‘राईटस् लि.’ ही कंपनी केंद्र शासनाचा उपक्रम असून, ती आरेखन सल्लागार व प्रकल्प व्यवस्थापन सल्लागार म्हणून काम करेल. या प्रकल्पाला केंद्र शासनाच्या संरक्षण, तसेच वने व पर्यावरण मंत्रालयाकडून परवानगी मिळालेली आहे.
पाहणीवेळी जिल्हाधिकारी शैलेश नवाल, महाराष्ट्र विमानतळ विकास प्राधिकरणाचे (एमएडीसी) मुख्य अभियंता एस. के. चटर्जी, माजी आमदार वीरेंद्र जगताप, रामेश्वर कुरजेकर, त्याचप्रमाणे राईटस् लि. या कंपनीचे अधिकारी आदी उपस्थित होते.
