अकोला : २९ एप्रिल – अकोल्याच्या सिटी कोतवाली पोलिस ठाण्यात बुधवारी रात्री उशिरा मुंबई व ठाण्याचे माजी पोलीस आयुक्त परमबीर सिंग यांच्यासह २७ पोलिस अधिकाऱ्यांविरुद्ध ॲट्रॉसिटी ॲक्टसह विविध कलमान्वये गुन्हा दाखल करण्यात आला आहे. हा गुन्हा दाखल करून प्रकरण ठाणे पोलिसांकडे तपासासाठी वळते करण्यात येणार असल्याची माहिती सूत्रांनी दिली.
ठाणे शहर पोलिस आयुक्तपदी असताना परमबीर सिंग यांनी भ्रष्टाचार केल्याची तक्रार पोलीस निरीक्षक भिमराज घाडगे यांनी पोलिस महासंचालक तसेच लाचलुचपत प्रतिबंधक विभागाचे पोलिस महासंचालक यांच्याकडे केली होती. सोबतच २७ पोलिस अधिकाऱ्यांनी भिमराज घाडगे यांना जातीवाचक शिवीगाळ केल्याची तक्रार भिमराज घाडगे यांनी सिटी कोतवाली पोलिस ठाण्यात दिली. यात पराग मनेरे, संजय शिंदे, सुनील भारद्वाज, विजय फुलकर या चार पोलिस अधिकार्यांसह इतरांचा समावेश असल्याचे वृत्त आहे.
या तक्रारीवरून सिटी कोतवाली पोलिसांनी परमवीरसिंग यांच्याविरुद्ध ॲट्रॉसिटी ऍक्ट अन्वये गुन्हा दाखल केला आहे.सोबतच तब्बल २७ पोलिस अधिकाऱ्यांविरुद्ध ॲट्रॉसिटी ऍक्ट अन्वये गुन्हा दाखल केला आहे. गुन्हा दाखल केल्यानंतर प्रकरण ठाणे पोलिसांकडे तपासासाठी वळते करण्यात येणार असून या प्रकरणाचा तपास ठाणे पोलिसांकडून करण्यात येणार असल्याची माहिती सूत्रांनी दिली आहे. मुंबई व ठाण्याचे माजी पोलीस आयुक्त परमबीर सिंग यांच्याविरुद्ध अकोल्यातील सिटी कोतवाली पोलिस ठाण्यात पहिला गुन्हा दाखल झाला आहे. भीमराज घाडगे यांच्या तक्रारीवरून परमबीर सिंग यांच्याविरुद्ध आणखी काही गुन्हे दाखल होणार असल्याची माहिती सूत्रांकडून प्राप्त झाली आहे. त्यामध्ये भ्रष्टाचारासह जातीवाचक शिवीगाळ व अन्य काही गंभीर प्रकरणांचा समावेश असल्याचे सूत्रांचे म्हणणे आहे.
