असे असेल मोदी मंत्रिमंडळातील सोशल इंजिनियरिंग

नवी दिल्ली : पंतप्रधान नरेंद्र मोदी मंत्रिमंडळाचा आज विस्तार होतोय. आज होणाऱ्या मंत्रिमंडळ विस्तारात तब्बल ४३ नेते मंत्रिपदाची शपथ घेणार असल्याचं समजतंय. सूत्रांच्या माहितीनुसार, नव्या मंत्रिमंडळात चार माजी मुख्यमंत्र्यांना जागा मिळण्याची शक्यता आहे. तसंच या मंत्रिमंडळात १३ वकील, ६ डॉक्टर, ५ इंजिनिअर्स आणि ७ माजी सरकारी अधिकाऱ्यांचाही समावेश असणार आहे.
मोदींच्या नव्या मंत्रिमंडळात तरुणांना जागा देण्याचा प्रयत्न करण्यात आलाय. या मंत्रिमंडळातील १४ मंत्र्यांचं वय ५० वर्षांहून कमी आहे.
चार मुख्यमंत्र्यांशिवाय या मंत्रिमंडळात १८ माजी राज्य मंत्र्यांचाही समावेश असू शकतो. तसंच ३९ माजी आमदारांनाही मंत्रिमंडळात जागा मिळणार आहे. २३ असे खासदार आहेत ज्यांनी तीन किंवा त्याहून जास्त वेळा विजय निश्चित केलाय. तसंच या मंत्रिमंडळात ४६ असे मंत्री असतील ज्यांच्या गाठिशी केंद्रात काम करण्याचा अनुभव आहे.
नव्या मंत्रिमंडळात ११ महिलांना जागा मिळण्याची शक्यता आहे. यातील दोन महिलांना कॅबिनेट मंत्री पदही मिळणार आहे.
मोदींच्या नव्या मंत्रिमंडळात पाच अल्पसंख्यांक मंत्री असतील. यात १ मुस्लीम, १ शीख, २ बौद्ध आणि १ ख्रिश्चन असतील. मंत्रिमंडळात २७ ओबीसी मंत्री असतील. यातील ५ जणांना कॅबिनेट मंत्री पद मिळू शकतं. सोबतच ८ जण अनुसूचित जमातीशी निगडीत असतील. यातील ३ जणांना कॅबिनेट मंत्री पद मिळेल. १२ मंत्री अनुसूचित जातीतून असतील तर यातील दोघांना कॅबिनेट मंत्र्याचा दर्जा दिला जाईल.

Leave a Reply