अनिल देशमुखांच्या स्वीय सचिवांच्या पोलीस कोठडीत २० जुलैपर्यंत वाढ

मुंबई : ६ जुलै – माजी गृहमंत्री अनिल देशमुख यांचे स्वीय सचिव संजीव पलांडे आणि स्वीय सहाय्यक कुंदन शिंदे यांच्या ईडी कोठडीत वाढ करण्यात आली आहे. ईडी कोठडीत स्पेशल पीएमएलए कोर्टानं आणखी चौदा दिवसांची वाढ केली आहे. त्यामुळं या दोघांना आता २० जुलैपर्यंत ईडी कोठडीत असतील.
उद्योगपती मुकेश अंबानी यांच्या अँटिलीया या घराजवळ एका गाडीत स्फोटके सापडल्यानंतर, मुंबईचे तत्कालीन पोलिस आयुक्त परमबीर सिंह यांनी एक पत्र लिहून अनिल देशमुख यांनी गृहमंत्री या नात्याने १०० कोटी रुपयांच्या खंडणी वसुलीचे लक्ष्य दिल्याचा आरोप केला होता. त्याचवेळी, ईडीने याप्रकरणी माजी पोलीस निरीक्षक सचिन वाझेचीदेखील चौकशी केली. अनिल देशमुख यांनी पैशांचा गैरवापर केला, असा ईडीला संशय आहे. त्यातूनच ईडीने देशमुख यांच्याघरावर धाडी टाकल्या होत्या. त्यानंतर त्यांच्या स्वीय सहाय्यक आणि स्वीय सचिवांना चौकशीसाठी ताब्यात घेतलं होतं.

मुंबईतील रेस्टॉरंट व बार मालकांकडून अनिल देशमुख यांना चार कोटी रुपयांहून अधिक रक्कम मिळाली आणि ती त्यांच्या विविध संस्था व बनावट कंपन्यांमध्ये वळवण्यात आली, असा आरोप ईडीने केला आहे. देशमुख यांच्यासह पलांडे व शिंदे यांच्या निवासस्थानी छापे घातल्यानंतर ईडीच्या अधिकाऱ्यांनी पलांडे व शिंदे यांना २६ जून रोजी अटक केली होती. दोघांची ईडी कोठडी संपत असल्याने त्यांना आज न्या. एस. एम. भोसले यांच्यासमोर हजर करण्यात आले होते.

दरम्यान, ‘माजी पोलिस अधिकारी सचिन वाझे याची १५ वर्षांनंतर पुन्हा करण्यात आलेली नेमणूक आणि इतर पोलिस अधिकाऱ्यांच्या बदल्या याविषयी चौकशी होणे आवश्यक आहे. आयपीएस अधिकाऱ्यांच्या बदल्यांमध्ये तत्कालीन गृहमंत्री अनिल देशमुख यांचा संबंध होता, हे त्यांचा स्वीय सचिव संजीव पलांडे याच्या जबाबातून समोर आले आहे. पोलिस अधिकाऱ्यांच्या बदल्यांविषयी अनधिकृत यादी बनवण्यात आली होती आणि त्याबाबत बैठक झाली होती, असेही तपासात समोर आले आहे.

Leave a Reply