श्रीनगर : २ जुलै – जम्मू काश्मीरमध्ये गुरुवारी रात्री उशिरापासून दहशतवादी आणि सुरक्षादलामध्ये चकमक सुरू आहे. या भागात दहशतवादी लपून बसल्याची माहिती मिळाल्यानंतर सुरक्षादलानं या भागाला घेराव घातला होता. आजच्या चकमकीत सुरक्षा दलानं तीन दहशतवाद्यांना टिपलंय तर सुरक्षादलातील एक जवानही या चकमकीत शहीद झालाय. अद्याप ही चकमक संपलेली नाही. दोन्ही बाजुंनी गोळीबार सुरू आहे.
सुरक्षादलाकडून संयुक्तरित्या ही मोहीम राबवण्यात येतेय. यामध्ये पोलीस, सीआरपीएफ आणि सेनेच्या ४४ आरआर (राष्ट्रीय रायफल्स) च्या जवानांचा समावेश आहे.
काश्मीर विभागाचे पोलीस महासंचालक विजय कुमार यांनी दिलेल्या माहितीनुसार, पुलवामाच्या हाजिन राजपोरा भागात ही चकमक सुरू आहे. या चकमकीत ठार झालेले तीघेही जण लष्कर ए तोयबाशी संबंधित आहेत.
सुरक्षादलानं चारही बाजुंनी घेरल्यानंतर दहशतवाद्यांना आत्मसमर्पण करण्याचं आवाहन करण्यात आलं होतं. मात्र, दहशतवाद्यांकडून सुरक्षादलावर गोळीबार सुरू करण्यात आला. याला सुरक्षादलानंही चोख प्रत्यूत्तर दिलं. गोळीबारा दरम्यान एका जवानही गोळी लागल्यानं गंभीर जखमी झाला. सहकारी जवानांनी त्याला तातडीनं रुग्णालयात हलवलं परंतु, उपचारादरम्यान या जवानाचा मृत्यू झाला. शहीद जवानांच नाव हवालदार काशी राव असल्याचं समजतंय.
दुसरीकडे, दक्षिण काश्मीरच्या अनंतनागमध्येही दहशतवाद्यांनी पोलिसांच्या ताफ्यावर अचानक हल्ला चढवला. या हल्ल्यात एक पोलीस जखनी झाला आहे. या भागातदेखील सर्च ऑपरेशन राबवण्यात येतंय.
