वाशिम : १० मे – वाशीम जिल्ह्यातील कारंजा मतदारसंघाचे राष्ट्रवादी काँग्रेसचे माजी आमदार प्रकाश डहाके यांचं निधन झालं आहे. काही दिवसांआधी त्यांना करोनाची लागण झाली होती. नागपूरच्या शूअरटेक रुग्णालयात उपचार दरम्यान त्यांची प्राणज्योत मालवली. ते मृत्यू ६७ वर्षांचे होते. त्यांच्या अशा अकाली जाण्यामुळे संपर्ण शहरात आणि पक्षामध्ये शोककळा पसरली आहे.
मिळालेल्या माहितीनुसार, काही दिवसांआधी त्यांना आणि त्यांच्या पत्नी व एका मुलाला करोनाची लागण झाली होती. यावेळी त्यांची प्रकृती खालावली. यावेळी उपचारासाठी त्यांना अमरावती इथं दाखल करण्यात आलं. या ठिकाणी उपचार दरम्यान प्रकृतीत सुधारणा होत नसल्यामुळे त्यांना नागपूर इथल्या शूअरटेक रुग्णालयात दाखल करण्यात आलं. मात्र, आज उपचारादरम्यान, त्यांचा मृत्यू झाल्याची माहिती आहे. त्यांच्या निधनाने कुटुंबालाही मोठा धक्का बसला आहे.
डहाके हे मुळचे काँगेसचे त्यानंतर राष्ट्रवादीचे सक्रिय कार्यकर्ते होते. २००४ साली भारिप-बमसच्या तिकिटावर त्यांनी विधानसभा निवडणूक लढवली. पण यात त्यांचा पराभव झाला. त्यानंतर २००९ साली राष्ट्रवादी काँग्रेसचे आमदार म्हणून ते निवडून आले. या निवडणुकीत त्यांनी शिवसेनेचे राजेंद्र पाटणी यांचा पराभव केला होता. डहाके यांनी राजेंद्र पाटणी यांचा ६२ हजार मतांनी पराभव केला.
याच काळात विदर्भ विकास महामंडळाच्या अध्यक्षपदीही त्यांची निवड झाली. त्य नंतर २०१४ मध्ये राष्ट्रवादीने विधानसभेच तिकीट नाकारल्याने त्यांनी अपक्ष म्हणून निवडणूक लढली होती. त्यावेळेस त्यांचा पराभव भाजपचे राजेंद्र पाटणी यांनी केला होता.
मधल्या काळात त्यांनी शिवबंधन ही बांधले होते. २०१९ साली त्यांनी पुन्हा राष्ट्रवादीमध्ये प्रवेश केला. माजी केंद्रीय मंत्री शरद पवार यांचे ते अत्यंत विश्वासू सहकारी मानले जातात. कारंजा कृषी उत्पन्न बाजार समितीत त्यांनी सतत १५ वर्ष सभापती पद सांभाळलं.
या काळात त्यांनी शेतकऱ्यांसाठी वेगवेगळ्या योजनाही राबवल्या तर महाराष्ट्र राज्याचे गृहमंत्री दिलीप वळसे पाटील यांचे ते मेहुणे होते. त्यांच्या मागे पत्नी आणि दोन मुले असा परिवार आहे. डहाके यांच्या जाण्यामुळे त्यांच्या कुटुंबावर दु:खाचा डोंगर कोसळला आहे.
